काठमाडौं । नेकपा (एमाले)का महासचिव शंकर पोखरेलले नेपालको बामपन्थी आन्दोलनलाई पुष्पकमल दाहाल ‘प्रचण्ड’ र माधवकुमार नेपालका कारण ठूलो क्षति पुगेको वताउनुभएको छ ।  

नेकपा (एमाले) केन्द्रीय कार्यालय, च्यासल, ललितपुरमा बिहीबार माओवादीका कार्यकर्ताहरूलाई पार्टी प्रवेश गराउँदै महासचिव पोखरेलले कम्युनिष्ट पार्टी विभाजन गरी आन्दोलनलाई क्षति पुर्याउने काममा कार्यकर्ता भने दोषी नरहेको वताउनुभयो ।   

महासचिव पोखरेलले नेपाली समाजलाई अगाडि बढाउन बलिया राजनीतिक दलहरूको आवश्यकता रहेका वताउँदै त्यो भनेको नीतिका आधारमा देशको नेतृत्व गर्न सक्ने बलियो राजनीतिक दल हो भन्नुभयो ।

धेरै राजनीतिक दलका कारण बलियो सरकार बनाउन नसकिएको चर्चा गर्दै महासचिव पोखरेलले धेरै राजनीतिक दल हुनु भनेको जनमतको विभाजन हो र यो राज्यलाई कमजोर पार्ने आधार हो भन्नुभयो ।

उहाँले भन्नुभयो– जति धेरै राजनीतिक दल त्यति धेरै राजनीतिक विचलल, जति धेरै राजनीतिक दल त्यति धेरै राजनीतिक अस्थिरता, जति धेरै राजनीतिक दल त्यति धेरै बैदेशिक हस्तक्षेप भन्ने कुरा हामीले बुझ्नुपर्छ । 

‘अहिले हामीले भोगिरहेको पीडा यही हो’, उहाँले मुलुक निर्माणका लागि दूरदर्शी नेतृत्व, दोस्रो बलियो राजनीतिक दल र राजनीतिक स्थायित्व आवश्यक पर्ने र त्यो आवश्यकता पूरा गर्न सक्ने पार्टी नेकपा (एमाले) मात्रै हो भन्नुभयो । 

नेकपा (एमाले)का अध्यक्ष केपी शर्मा ओली नेपाली समाजलाई गहिरोसँग बुझ्नसक्ने नेता भएको चर्चा गर्दै महासचिव पोखरेलले भन्नुभयो– उहाँले आफूलाई विकास र समृद्धिको योजनाकारको रूपमा उभ्याउनु भएको छ ।

उहाँले नेकपा माओवादी केन्द्र पहिलो संविधानसभा निर्वाचनमा करीब ३० प्रतिशत मतसहित पहिलो दलका रूपमा आएको स्मरण गर्दै दोस्रो संविधानसभामा पुग्दा ओरालो लागेर करीब २३ प्रतिशत र गत मंसिर–४ को निर्वाचनमा माओवादीको मत करीब ११ प्रतिशतको हाराहारीमा झरेको यथार्थ सुनाउँदै त्यो दलको भविष्य नरहेको विष्लेषण प्रस्तुत गर्नुभयो । 

महासचिव पोखरेलले भन्नुभयो– माओवादीका अहिलेका गतिविधिका कारण आउँदो निर्वाचनमा त्यो दल अझ कमजोर भएर जानेछ, मुलुकको बलियो शक्तिका रूपमा स्थापित हुने सम्भावना छैन । 

उहाँले अहिलेको सरकार वैधानिक अर्थतन्त्रलाई कमजोर र अवैधानिक अर्थतन्त्रलाई बलियो बनाउने तस्करीतन्त्र र दलाल नोकरशाहीतन्त्रलाई प्रोत्साहन गर्ने जस्ता गतिविधिमा अघि बढेको वताउनुभयो । 

महासचिव पोखरेलले माओवादी जनताको सरकार होइन, दलाल नोकरशाहीहरूको हिमायती बनेको वताउनुभयो । 

कार्यक्रममा वाइसीएल ललितपुर महानगरका अध्यक्ष सुजिन महर्जनसहित करीब ७० जना एमाले प्रवेश गरेका थिए