काठमाडौं । नेकपा (एमाले)का महासचिव शंकर पोखरेलले समाजको अत्यधिक ठुलो सङ्ख्या परिवर्तनको पक्षमा रहेकाले राजतन्त्र पक्षधरका कुनै सपना पूरा नहुने बताउनुभएको छ । 

महासचिव पोखरेलले राजावादीहरूको आन्दोलनले सङ्घीय लोकतान्त्रिक गणतन्त्रात्मक व्यवस्थालाई असर नगर्ने स्पष्ट गर्नुभयो । 

पार्टीको केन्द्रीय वन तथा वातावरण विभागद्वारा आयोजित ‘वनको दिगो व्यवस्थापन, समृद्धि र जलवायु न्याय’ विषयक प्रशिक्षण तथा राष्ट्रिय भेलालाई आज पार्टी कार्यालय, च्यासलमा सम्बोधन गर्दै राजतन्त्रको समयमा भोगेको कष्ट नयाँ पुस्तालाई बताउन भने जरूरी रहेको बताउनुभयो । अन्यथा उनीहरू राजतन्त्रवादीहरूको भ्रमको खेतीबाट प्रभावित हुनसक्ने महासचिव पोखरेलको भनाइ छ । 

देशमा लोकतन्त्र आएपछि यति धेरै परिवर्तन भएका कुरा युवालाई बुझाउन नसक्दा राजावादीहरूले भ्रम फिँजाउने काम गरेको उहाँले बताउनुभयो । 

महासचिव पोखरेलले अहिले सरकार ढल्छ भनी गरिएका हल्लामा कुनै सत्यता नभएको स्पष्ट गर्नुभयो ।  

राजनीतिक स्थिरता राख्ने र देशलाई निकास दिने कुरामा सत्तारुढ दल एकमत रहेको बताउँदै उहाँले भन्नुभयो– दुई पार्टी नेपाली कांग्रेस र नेकपा (एमाले)का शीर्ष नेतृत्व बीच राम्रो सम्बन्ध छ, सरकार ढल्छ भन्ने कुरामा कुनै सत्यता छैन । 

महासचिव पोखरेलले तर, पछिल्लो समय देश राजनीतिक सङ्क्रमणमा परेको बताउनुभयो । 

अहिले परिवर्तन, राजनीतिक दल र व्यवस्थाप्रति सुनियोजित रूपमा वितृष्णा जगाउने प्रयत्न भइरहेको बताउँदै उहाँले भन्नुभयो– राजनीतिलाई जब अस्थिर बनाउने गरिन्छ, त्यति बेला प्रकृतिको दोहन बढ्छ । 

बलिया राजनीतिक दल, राज्य र सरकार हुँदा मात्र नागरिक र देशका साधन स्रोतको संरक्षण गर्न सकिने हुँदा एमालेले बलियो राष्ट्रिय शक्ति निर्माणको अभियान चलाएको महासचिव पोखरेलले स्पष्ट पार्नुभयो । उहाँले भन्नुभयो– एमालेको नीति राष्ट्रको नीति बन्यो भने मात्र राष्ट्र बलियो बन्छ, त्यसका लागि एमाले बहुमत प्राप्त राष्ट्रिय शक्ति बन्नु पर्दछ । 

वन क्षेत्र बलियो बनाउन पनि बलियो राजनीतिक शक्ति आवश्यक रहेको उहाँले स्पष्ट पार्नुभयो । 

नेपालको वनको विनाश सबैभन्दा बढी राणा र राजाहरूको पालामा भएको कुरा बिर्सन नहुने महासचिव पोखरेलले स्पष्ट पार्नुभयो । 

डढेलो अहिले विश्वव्यापी समस्या बन्दै गएको र जतिसुकै शक्तिशाली राष्ट्रलाई पनि डढेलो नियन्त्रण गर्न गाह्रो हुन्छ भन्ने कुरा अमेरिकाको डढेलाले देखाएको उहाँले बताउनुभयो । 

नेपालमा खेतबारी जोत्ने काम कम भएको कारण पनि डढेलोको जोखिम थप बढ्दै गएको उहाँले बताउनुभयो । घाँस र पत्कर जम्मा गरेर लगाएको आगो उम्किँदा धेरै डढेलो लाग्ने गरेको महासचिव पोखरेलले स्पष्ट पार्नुभयो । 

मौसमको असन्तुलनको असरका कारण पनि नेपालले भीषण जोखिम बेहोर्नुपर्ने स्थिति आएको तथा हिम पहिरो र हिमताल फुट्दा धेरै मानव बस्ती प्रभावित हुन लागेको उहाँले सुनाउनुभयो । 

अस्वाभाविक वर्षाको कारण पनि नेपालले विपत्ति भोग्न लागेको र यो पनि जलवायु परिवर्तनको असर नै भएको महासचिव पोखरेलको धारणा छ । त्यसैले अब विपतजन्य सुरक्षामा नयाँ हिसाबले अघि बढ्नुपर्नेमा उहाँको जोड छ । 

जलवायु परिवर्तनका प्रभावका कारण उत्पन्न हुने विपतबाट बच्न अब परम्परागत योजनाले काम नगर्ने महासचिव पोखरेलले स्पष्ट पार्नुभयो । ‘नयाँ परिस्थिति जन्मिएको कारणले हाम्रा सोच, विचार र व्यवहार परिवर्तन आवश्यक छ’, उहाँले भन्नुभयो । 

जलवायु परिवर्तनसँग सम्बन्धित मुद्दालाई उजागर गर्न सरकारले सगरमाथा संवाद कार्यक्रम आयोजना गरेको र सो संवादले जलवायु परिवर्तनको प्रभाव नियन्त्रण गर्न ठुलो सहयोग पुग्ने विश्वास महासचिव पोखरेलले व्यक्त गर्नुभयो । 

जलवायु न्याय प्राप्त गर्ने कुरा निक्कै कठिन बन्दै गएको उल्लेख गर्दै यस विषयमा अन्तर्राष्ट्रिय समुदाय उदार नदेखिएको महासचिव पोखरेलको भनाइ छ । यसो हुँदा हुँदै पनि यो मुद्दा निरन्तर उठाइरहनुपर्नेमा उहाँले जोड दिनुभयो । 

महासचिव पोखरेलले वनको दिगो र वैज्ञानिक व्यवस्थापनमा जोड दिनुपर्नेमा जोड दिँदै त्यतिकै प्राकृतिक रूपमा छाडिदिने हो भने वन आफै नष्ट भएर जाने बताउनुभयो । वनबाट प्रतिफल लिने गरी योजना बनाउन उहाँले सुझाव दिनुभयो । वनको व्यवस्थापन गर्दा मानिसका आवश्यकता पुरा गर्ने गरी योजना बनाउनुपर्ने महासचिव पोखरेलले बताउनुभयो ।