तुलसीपुर (दाङ) । नेकपा (एमाले)का महासचिव शंकर पोखरेलले दाङमा भदौ २३ र २४ गतेको आन्दोलनका क्रममा क्षति पुगेका विभिन्न सरकारी तथा निजी संरचनाको स्थलगत अवलोकन गर्नुभएको छ । 

महासचिव पोखरेलले कात्तिक ११ र १२ गते दाङका विभिन्न स्थानमा सरकारी  र निजी संरचनाको स्थलगत अवलोकन गर्नुभएको हो । 

उहाँले मंगलबार दिउँसो तुलसीपुरका विभिन्न स्थानमा पुगेर क्षतिग्रस्त संरचनाहरूको अवस्थाबारे जानकारी लिनुभयो । त्यसैगरी आज पनि घोराही लगायत स्थानका क्षतिग्रस्त संरचना अवलोकन गर्नुभयो । 

महासचिव पोखरेलले तुलसीपुर उपमहानगरपालिकाको कार्यालय, आन्तरिक राजस्व कार्यालय, उच्च अदालत तुलसीपुर इजलास, जिल्ला प्रशासन कार्यालयको आसपासका क्षेत्र, कोमल रिसोर्ट साथै नेपाली कांग्रेसका नेताहरू गेहेन्द्र गिरी र डिल्ली चौधरीका घरलगायतका संरचनाहरू अवलोकन गर्नुभयो । 

बुधबार महासचिव पोखरेलले घोराहीस्थित क्षतिग्रस्त सडक डिभिजन कार्यालय, होटल माला– इन, नेपाली कांग्रेसको दाङ जिल्ला कार्यालय, घोराही उपमहानगरपालिका कार्यालय, मालपोत कार्यालय, घोराही उपमहानगरपालिकाका प्रमुख नरुलाल चौधरीको निजी घर, नेकपा (एमाले) दाङको कार्यालय भवनको स्थलगत अनुगमन गर्नुभयो । 

भदौ २३ र २४ गते तुलसीपुरमा भएको आन्दोलनका क्रममा तोडफोड, आगजनी र हिंसात्मक गतिविधिका कारण सरकारी सम्पत्तिसहित निजी घर तथा व्यावसायिक प्रतिष्ठानहरूमा ठूलो क्षति पुगेको थियो । महासचिव पोखरेलले क्षतिग्रस्त संरचनाको अवलोकन गर्दै घटनाप्रति दुःख व्यक्त गर्नुभयो । 

पत्रकारहरूसँग कुरा गर्दै महासचिव पोखरेलले आन्दोलनका नाममा हिंसात्मक गतिविधि गर्नु दुःखद भएको बताउनुभयो । उहाँले भन्नुभयो– लोकतान्त्रिक प्रणालीमा असन्तुष्टि जनाउने अधिकार सबैलाई छ तर त्यो शान्तिपूर्ण र जिम्मेवार ढङ्गले हुनुपर्छ । सार्वजनिक सम्पत्ति तोडफोड गरेर जनताको धन र अधिकारमाथि नै प्रहार गर्नु लोकतन्त्रको भावना विपरीत हो ।